"Claude" 167 illik hipotezin həllinə cəmi 1,5 günə yaxınlaşdı

Süni intellekt hələ də riyaziyyat tarixinin ən məşhur problemlərindən biri olan Riman hipotezini sübut etməyib. Lakin "Anthropic" şirkətinin eksperimental süni intellekt modeli "Claude" yaxın vaxtlara qədər fövqəladə görünən bir nəticəyə nail olub.

Valyuta.az xəbər verir ki, bu barədə "Onet Wiadomosci" yazıb.

"Claude" cəmi bir gün yarım ərzində riyaziyyatçıların onilliklər ərzində üzərində çalışdığı nəticəni əhəmiyyətli dərəcədə yaxşılaşdırıb.

Məlum olduğu kimi, Riman hipotezi 1859-cu ildə alman riyaziyyatçısı Bernhard Riman tərəfindən irəli sürülüb. Hipotez Riman zeta funksiyası adlanan anlayışla bağlıdır və sadə ədədlərin paylanması ilə sıx əlaqəlidir. Riman belə fərz edirdi ki, zeta funksiyasının bütün qeyri-trivial sıfırları kritik xətt adlanan xüsusi bir düz xətt üzərində yerləşir.

Bu, mürəkkəb məsələdir, lakin riyaziyyat qanunları ilə fizika qanunları arasındakı əlaqənin öyrənilməsi baxımından mühüm əhəmiyyət daşıyır. Problem ondadır ki, artıq 167 ildir heç kim bu hipotezi sübut edə bilməyib.

Riyaziyyatçılar, əlbəttə, bu sıfırların müəyyən hissəsinin Rimanın proqnozlaşdırdığı yerdə yerləşdiyini göstərə bilirlər. İndiyədək onilliklər əvvəl əldə edilmiş ən yaxşı nəticə sıfırların ən azı 41,6 faizinin kritik xətt üzərində olduğunu təmin edirdi.

"Claude" bu göstəricini 67,2 faizə çatdırıb. Lakin bu, süni intellektin hipotezin həllinə gedən yolun 2/3-ni qət etdiyi anlamına gəlmir. Bu, tamamilə fərqli xarakter daşıyan nəticədir və tam sübuta hələ çox uzun yol ola bilər.

"Claude" nəticəni yaxşılaşdırmaq üçün təxminən 650 ideyanı sınaqdan keçirib və onların uğursuz olduğu müəyyənləşib. Daha sonra süni intellekt təxminən bir gün yarım ərzində özünün 60-a yaxın alt-agentinin işini koordinasiya edib.

Alt-agentlər hesablamalar aparıb, proqramlar yazıb, minlərlə sınaq keçirib, bir-birlərinin mülahizələrini yoxlayıb və elmi ədəbiyyatı araşdırıblar.

Nəticəni əldə etdikdən sonra süni intellekt öz mülahizələrində səhvlər axtarmağa və sübutu müstəqil üsullarla yenidən əldə etməyə də çalışıb.

Əsas məqam ondan ibarətdir ki, "Claude" bütün zəruri riyaziyyatı sıfırdan yaratmayıb. O, riyaziyyatçıların daha əvvəl əldə etdiyi nəticələrdən istifadə və onları birləşdirərək əvvəllər heç bir riyaziyyatçının istifadə etmədiyi imkanları üzə çıxarıb.

"Anthropic" bu nailiyyəti təqdim edərkən vurğulayıb ki, süni intellektin üstünlüyü mütləq qəfil dahiyanə ideyanın ortaya çıxmasında olmamalıdır. Bu üstünlük insan üçün əlçatmaz miqyasda səbr nümayiş etdirməkdən də qaynaqlana bilər: yüzlərlə hipotezi yoxlamaq, yüzlərlə yanlış istiqaməti kənara atmaq və dərhal növbəti cəhdə başlamaq imkanı.

Yaxın vaxtlara qədər süni intellekt modellərinin riyaziyyatdakı bacarıqları əsasən insanların cavablarını artıq bildiyi məsələləri həll edib-etməmələri ilə ölçülürdü.

"Anthropic"in eksperimenti isə daha maraqlı mənzərə ortaya qoyur. Sahə üzrə "AI Secret" bülleteni qeyd edir ki, alimlər hansısa hipotezi sübut etmək üçün 30 uğursuz cəhddən sonra orta hesabla təslim olurlar. Süni intellekt isə yüzlərlə uğursuz cəhddən sonra belə dayanmayıb.