«Avrasiya Bank»ın plastik kart biznesi - 2 İLDİR ZƏRƏRLƏ İŞLƏYİR
Plastik kartlar «Avrasiya Bank» üçün yenə də zərər mənbəyidir.
FED.az biznes və maliyyə xəbərləri portalı xəbər verir ki, biznesinin plastik kart seqmenti banka 2 ildir ki, zərər gətirməkdədir.
Bankdan verilən məlumata görə, «Bank Avrasiya» öz müştərilərinin plastik kartlarla əməliyyatlardan 2024-cü ildə 1 milyon 174 min manat, 2025-ci ildə isə 1 milyon 553 min manat gəlir komissiya gəliri əldə edib.
Bununla yanaşı, bankın özünün bu əməliyyatlara xərclədiyi vəsait kartlardan gələn gəliri üstələyib. Belə ki, «Bank Avrasiya» 2024-cü ildə plastik kartlarla əməliyyatlar üzrə 1 milyon 677 min manat, 2025-ci ildə isə 2 milyon 460 min manat komissiya haqqı ödəyib.
Başqa sözlə, bank plastik kart əməliyyatları üzrə 2024-cü ildə 503 min manat, 2025-ci ildə isə 907 min manat zərər edib. 2 illik müddətdə ümumi zərər 1 milyon 410 min manat təşkil edib.
Ümumiyyətlə, «Bank Avrasiya» bütün komissiyalar üzrə gəlir və xərclərdə 2 ildir ki, zərərdədir. Nə 2024-cü ildə, nə də 2025-ci ildə bankın komissiya gəlirləri komissiya xərclərini qarşılaya bilməyib. 2024-cü ildə komissiyaların gəlir-xərc fərqi mənfi 110 min manat, 2025-də isə mənfi 425 min manat olub.
Bu vəziyyət, yəni bank biznesinin əsas gəlir maddələrindən birini təşkil edən sahənin hələ də mənfidə olması - bankın məhsul və xidmətlərindən istifadə səviyyəsinin və müştəri aktivliyinin hələ də lazımi (xərcləri qarşalayan) səviyyəyə çatmadığını göstərir.
