Azərbaycan-Gürcüstan əlaqələri yüksələn xətlə inkişaf edir - ŞƏRH
Azərbaycan və Gürcüstan münasibətləri dinamik xarakter daşıyır və daim inkişaf etməkdədir.
Azərbaycan Respublikasının Prezidenti cənab İlham Əliyevin 2026-cı il aprelin 6-da Gürcüstana rəsmi səfəri çərçivəsində mətbuata verdiyi bəyanat Azərbaycan–Gürcüstan münasibətlərinin strateji mahiyyətini bir daha aydın şəkildə ortaya qoyur. Dövlət başçısının “Yenidən qardaş Gürcüstanda olmaq mənim üçün böyük şərəfdir” sözləri təkcə diplomatik etiket çərçivəsində deyil, eyni zamanda bu iki ölkə arasında formalaşmış dərin tarixi, mədəni və siyasi bağlılığın səmimi ifadəsi kimi qiymətləndirilməlidir.
Məlum olduğu kimi Azərbaycan ilə Gürcüstan arasındakı münasibətlər əsrlərə söykənən dostluq və qarşılıqlı hörmət prinsiplərinə əsaslanır. Qədim dövrlərdən etibarən hər iki xalq eyni coğrafiyada yanaşı yaşamış, müxtəlif tarixi sınaqlardan birlikdə keçmiş və bu proseslər zamanı qarşılıqlı dəstək nümayiş etdirmişdir. Bu gün də həmin ənənələr müasir dövlətlərarası münasibətlərdə öz əksini tapır. Cənab İlham Əliyevin vurğuladığı kimi, məhz bu möhkəm tarixi zəmin müasir əməkdaşlığın əsasını təşkil edir və əlaqələrin davamlı inkişafını təmin edir. Bu gün Azərbaycan və Gürcüstan arasında münasibətlər strateji tərəfdaşlıq səviyyəsinə yüksəlmişdir. Bu tərəfdaşlıq yalnız siyasi sahə ilə məhdudlaşmır, eyni zamanda iqtisadi, enerji, nəqliyyat, humanitar və təhlükəsizlik sahələrini də əhatə edir. Ölkə başçısının çıxışında qeyd olunduğu kimi, aparılan müzakirələr bir daha təsdiqləyir ki, hər iki dövlət bütün məsələlərdə vahid mövqedən çıxış edir və qarşılıqlı maraqlara əsaslanan siyasət yürüdür. Xüsusilə enerji və nəqliyyat layihələri Azərbaycan–Gürcüstan əməkdaşlığının ən parlaq nümunələrindəndir. Bu layihələr regionun iqtisadi xəritəsini dəyişdirməklə yanaşı, Avropanın enerji təhlükəsizliyində də mühüm rol oynayır. Azərbaycan qazının Gürcüstan üzərindən dünya bazarlarına çıxarılması, eləcə də beynəlxalq nəqliyyat dəhlizlərinin inkişafı hər iki ölkənin strateji əhəmiyyətini daha da artırır. Bu kontekstdə Gürcüstanın tranzit ölkə kimi rolu, Azərbaycanın isə enerji istehsalçısı və ixracatçısı kimi mövqeyi qarşılıqlı tamamlayıcı xarakter daşıyır. Möhtərəm Prezidentin nitqində diqqət çəkən məqamlardan biri Gürcüstanın əldə etdiyi uğurlar barədə oldu. Dövlət başçısının bu məqamı xüsusi vurğulaması və bu münasibətlə təbriklərini çatdırması iki ölkə arasında mövcud olan yüksək səviyyəli siyasi dialoqun göstəricisidir.
Bu yanaşma həm də onu göstərir ki, Azərbaycan Gürcüstanın inkişafını öz uğuru kimi qiymətləndirir və regionda sabitliyin, rifahın təmin olunmasında bu ölkənin rolunu yüksək dəyərləndirir. Eyni zamanda bu münasibət qarşılıqlı etimadın və səmimi tərəfdaşlığın təzahürüdür. Səfər çərçivəsində müzakirə olunan məsələlər yalnız cari əməkdaşlıq istiqamətlərini deyil, həm də gələcək perspektivləri əhatə etdi. Bu isə onu göstərir ki, Azərbaycan və Gürcüstan münasibətləri dinamik xarakter daşıyır və daim inkişaf etməkdədir. Yeni layihələrin həyata keçirilməsi, mövcud əməkdaşlıq mexanizmlərinin genişləndirilməsi və regional təşəbbüslərin irəli sürülməsi hər iki ölkənin strateji maraqlarına cavab verir.
Regionda baş verən geosiyasi proseslər fonunda Azərbaycan–Gürcüstan əməkdaşlığı sabitlik və təhlükəsizliyin təmin olunmasında mühüm amillərdən biridir. Hər iki ölkə beynəlxalq hüququn prinsiplərinə əsaslanaraq müstəqil siyasət yürüdür və regional əməkdaşlığın gücləndirilməsinə töhfə verir.
Prezident İlham Əliyevin bəyanatında da bu məqam aydın şəkildə öz əksini tapır: Azərbaycan və Gürcüstan hər zaman bir yerdədir və bu birlik region üçün mühüm strateji əhəmiyyət daşıyır. Bu səfər bir daha göstərdi ki, iki qardaş ölkə arasında mövcud olan dostluq və əməkdaşlıq yalnız keçmişin mirası deyil, eyni zamanda gələcəyə yönəlmiş güclü strateji tərəfdaşlıq modelidir.
Salman Abdullayev
Neftçala rayonu
