Bu dövlət 50 faiz devalvasiyaya gedir
Argentinada hökumət maliyyə böhranı ilə mübarizə çərçivəsində Argentina pesosunu dollar qarşısında 50 faizdən çox devalvasiya edəcəyini və dövlət xərclərini azaldacağını açıqlayıb.
Argentina mətbuatında çıxan xəbərlərdə hökumətin pesonu dollar qarşısında 54 faiz dəyərdən salacağı, həmçinin enerji və nəqliyyatda subsidiyaları azaldacağı bildirilir.
Dünən təxminən 365,50 Argentina pesosu olaraq qeydə alınan dolların məzənnəsinin 800 pesonu keçəcəyi gözlənilir.
Argentinanın yeni prezidenti Xavier Mileinin İqtisadiyyat naziri Luis Kaputo sosial mətbuata verdiyi açıqlamada ciddi maliyyə böhranı ilə mübarizə apardıqlarını və bunun aradan qaldırılması üçün bəzi tədbirlər gördüklərini və görəcəklərini bildirib.
Kaputo enerji və nəqliyyat subsidiyalarının azaldılacağını vurğulayaraq, "Enerji və nəqliyyat üçün subsidiyaları azaldacağıq. Bu gün dövlət subsidiyalar vasitəsilə enerji və nəqliyyat qiymətlərini çox aşağı saxlayır" deyib.
Ölkəni "çətin günlər gözlədiyini" vurğulayan Kaputo, "Bir neçə ay xüsusilə inflyasiya baxımından daha da pis olacağıq. Belə davam etsək, hiperinflyasiyaya gedəcəyimizdən şübhəniz olmasın" deyib.
İqtisadiyyat naziri Kaputo ölkədə yoxsulluğun 40 faiz səviyyəsində olduğunu xatırladıb və hökumətin ən həssas sektorlar üçün yeni sosial yardım proqramları elan edəcəyini qeyd edib.
Digər tərəfdən Beynəlxalq Valyuta Fondunun (BVF) prezidenti Kristalina Georgieva, "X" sosial media hesabındakı paylaşımında, Argentinanın mühüm iqtisadi çətinliklərinə həll yolları tapmaq üçün Milei və iqtisadi komandasının açıqladığı qətiyyətli tədbirləri alqışladığını bildirib.
Georgieva bəyan edib ki, bu, sabitliyin bərpası və ölkənin iqtisadi potensialının yenidən qurulması istiqamətində mühüm addımdır.
İllik inflyasiyanın 140 faizə çatdığı ölkədə hökumətin büdcə kəsirini azaltmaq üçün nəqliyyat və enerji sahələrində subsidiyaları azaldacağı, dövlət işlərində ciddi ixtisarlar aparacağı bildirilib.
Noyabrın 19-da Argentinada keçirilən prezident seçkilərinin ikinci turunda qalib gələn Xavyer Miley dekabrın 10-da and içərək vəzifəsini əvvəlki prezident Alberto Fernandesdən alıb.
Marja.az
