Sahibkarlar üçün yeni sistemi yaradıldı
Biznes Mühiti və Beynəlxalq Reytinqlər üzrə Komissiya sahibkarlara müraciət edib. Müraciətdə sahibkarlara yeni yaradılan “Elektron məlumatlandırma” sistemi haqqında məlumat verilib.
İqtisadi İslahatların Təhlili və Kommunikasiya Mərkəzindən bildirilib ki, Biznes Mühiti və Beynəlxalq Reytinqlər üzrə Komissiyanın işçi qruplarının gözlənilən iclasları barədə məlumatları qabaqcadan elektron poçt vasitəsilə operativ qaydada əldə etməyə imkan verən “Elektron məlumatlandırma” sistemi yaradılıb.
Sistemdə qeydiyyatdan keçməklə Komissiyanın fəaliyyəti ilə bağlı məlumat əldə etmək və ölkəmizin biznes mühitinin inkişafı naminə islahat təşəbbüslərinin hazırlanmasında və həyata keçirilməsində aktiv iştirak etmək mümkündür.
Bundan başqa, komissiyanın işçi qruplarının onlayn və üz-üzə keçirilən iclaslarında iştirak etmək və işçi qruplarının fəaliyyəti ilə bağlı təkliflər də göndərmək olar.
Sistemində istifadə etmək üçün https://azranking.az/protocols-announcements veb səhifəsinə daxil olaraq “Elektron məlumatlandırma” düyməsinə vurmaqla açılan pəncərəyə elektron poçt ünvanınızı daxil edib, 2-ci sətirdə müvafiq işçi qrupunun və ya qrupların üzərinə vurmaqla işçi qruplarının adlarını siyahıya əlavə etmək mümkündür.
Hər iki sütunda zəruri məlumatlar qeyd edildikdən sonra pəncərənin sol aşağı hissəsində “Təsdiq et” düyməsini vurmaqla müraciətin göndərilməsi tamamlanır.
