Azərbaycan "Chartered Insurance Institute"la strateji tərəfdaş olacaq

Azərbaycan Mərkəzi Bankı (AMB) Böyük Britaniyaya məxsus "Chartered Insurance Institute"la strateji tərəfdaşlıq münasibətləri qurmağa başlayıb.

BusinessTime bu barədə AMB-yə istinadən xəbər verir.

Məlumata görə, qurum maliyyə sektorunun kadr potensialının artırılmasını hədəfləyən təşəbbüslərin həyata keçirilməsini davam etdirir. "Chartered Insurance Institute"la strateji tərəfdaşlığın qurulması bu istiqamətdə növbəti mühüm mərhələyə çevrilib.

AMB-nin baş direktoru Vüsal Qurbanovun rəhbərlik etdiyi nümayəndə heyəti ilə institutun baş icraçı direktoru Metyu Hil arasında görüş keçirilib. Sığorta və maliyyə xidmətləri sahəsində peşəkar tədris üzrə dünyada aparıcı institutlardan biri olan bu təşkilatla görüş zamanı Azərbaycanda sığorta sektorunda insan kapitalının inkişafının dəstəklənməsi, ölkəmizin beynəlxalq standartlara uyğun sığorta üzrə regional tədris və təlim mərkəzinə çevrilməsi istiqamətində qarşılıqlı əməkdaşlığın həyata keçirilməsi perspektivləri müzakirə edilib.

Əməkdaşlıq çərçivəsində təşkilatın professor və ekspertlərinin iştirakı ilə Azərbaycanda həyata keçiriləcək beynəlxalq səviyyəli tədris proqramının tətbiq edilməsi üzrə ilkin razılıq əldə edilib. Bu proqram çərçivəsində sığorta və maliyyə sektorunda çalışan mütəxəssislər, eləcə də bu istiqamətdə karyera qurmaq istəyən şəxslər qlobal nüfuzlu institutun təklif etdiyi sığorta və risk menecmenti istiqaməti üzrə peşəkar təhsil imkanlarından faydalanacaq. Bununla da proqram, ölkədə əmək bazarında dövrümüzün tələbləri və ehtiyaclarına cavab verən peşəkar mütəxəssislərin hazırlanmasına xidmət edəcək.