Hindistanda iki şirkətin müştəri məlumatlarının sızdığı iddia edilir
“Vijay Sales”in daxili sistemlərinə girişin satışa çıxarıldığı iddia olunur. “AU Small Finance Bank” isə kənar platformada mümkün məlumat sızmasını araşdırır.
Hindistanda elektronika satıcısı "Vijay Sales"in daxili sistemlərinə girişin 25 min ABŞ dollarına satışa çıxarıldığı iddia edilir, "AU Small Finance Bank" isə kənar platformada mümkün məlumat sızmasını araşdırır.
Bu barədə BusinessTime "Digit.in"ə istinadən xəbər verir.
Məlumata görə, özünü "shinymontanna" adlandıran şəxs "Vijay Sales"in sistemlərində yüksək səviyyəli administrator səlahiyyəti əldə etdiyini bildirib. İddia edilən girişin 3 milyondan çox sifariş qeydinə, təxminən 15 min işçiyə və 140 minə yaxın təchizatçının hesablaşmalarına dair məlumatları əhatə etdiyi bildirilir. Şirkət materialın dərc olunduğu vaxtadək sızmanı təsdiqləməyib.
"AU Small Finance Bank" isə "Salesforce"un idarə etdiyi və yerləşdirdiyi proqram təminatı platformasında mümkün sızmanı araşdırdığını açıqlayıb. Bankın məlumatına görə, platformada avtomobil krediti müştərilərinə aid məhdud məlumatlar saxlanılır. Bank öz sistemlərinin hadisədən təsirlənmədiyini və xidmətlərin normal işlədiyini bildirib.
"ScarlettGroup" adlı haker qrupunun banka aid məxfi məlumatları yaymaqla hədələdiyi də iddia olunur. Müştərilərə bank və ya satıcı adından gələn şübhəli zənglərə, elektron məktublara və mesajlara diqqətlə yanaşmaq, şifrə və kart məlumatlarını paylaşmamaq tövsiyə edilir.
