"General Motors" sürücü məlumatları ilə bağlı 220 milyon dollar ödəyəcək

"General Motors" cümə axşamı ABŞ-ın 36 ştatının baş prokurorlarının sürücü məlumatlarının satışı ilə bağlı qaldırdığı iddianı həll etmək üçün 220 milyon ABŞ dolları ödəməyə razılaşıb. Bu barədə BusinessTime "The Record"a istinadən xəbər verir.

Baş prokurorlar şirkətin müştərilərin məkan və sürücülük davranışı barədə məlumatlarını məlumat brokerləri də daxil olmaqla üçüncü tərəflərə qanunsuz satdığını iddia ediblər. Vaşinqton ştatının baş prokuroru Nik Braunun açıqlamasına görə, brokerlər məlumatları sığorta şirkətlərinə satıb və bu, sürücülərə təklif olunan sığorta qiymətlərinə təsir edib.

İddiaya əsasən, avtomobil istehsalçısı 2016–2024-cü illərdə milyonlarla insanı "Smart Driver" proqramına qoşaraq onların sürücülük vərdişlərini izləyib. Şirkət məlumatların müştərilərin açıq razılığı olmadan sığortaçılara verilməyəcəyini bildirsə də, onları sonradan sığortaçılara satan brokerlərə təqdim etməkdə ittiham olunur. Proqram "The New York Times"ın bu təcrübəni üzə çıxarmasından sonra, 2024-cü ildə dayandırılıb.

Razılaşmaya əsasən, "General Motors" sürücülük davranışı və məkan məlumatlarını toplamadan və ya paylaşmadan əvvəl müştərilərin açıq razılığını almalıdır. Şirkət həmçinin topladığı məlumatların həcmini azaltmalı, onların mühafizəsini gücləndirməli və diler işçilərinə nəzarəti artırmalıdır.

Baş prokurorların bildirdiyinə görə, şirkət 370 mindən çox müştəriyə məlumatlarının izlənilmədiyini səhvən bildirib. Texas ştatının baş prokurorunun 2024-cü ildə "General Motors"a qarşı qaldırdığı oxşar iddia isə hələ davam edir.