Evdən işləmək istəyənlər nələrə diqqət etməlidir? - 4 əsas tövsiyə
Son illərdə texnologiyanın inkişafı məsafədən işləmək imkanlarını genişləndirib. Kompüter, videokonfrans və müxtəlif onlayn kommunikasiya vasitələri əməkdaşlara ofisə getmədən işlərini yerinə yetirməyə şərait yaradır. Bununla belə, evdən işləmək hər kəs üçün eyni dərəcədə uyğun olmaya bilər.
Valyuta.az xəbər verir ki, beynəlxalq iş və karyera platforması “Indeed” məsafədən iş tapmaq istəyən şəxslər üçün dörd əsas tövsiyə təqdim edib.
Belə ki, məsafədən işləmək vaxt və nəqliyyat xərclərinə qənaət etməyə, bəzi hallarda isə daha çevik iş qrafiki ilə çalışmağa imkan verir. Lakin bu iş modelini seçərkən şəxsi bacarıqlar, həyat tərzi və iş şəraiti nəzərə alınmalıdır.
1. Məsafədən işin sizə uyğun olub-olmadığını müəyyənləşdirin
İlk növbədə evdən işləməyin şəxsi həyat tərzinizə uyğunluğunu qiymətləndirmək lazımdır. Müstəqil işləməyi bacaran və ofis mühitindən kənarda daha məhsuldar olan şəxslər üçün bu model əlverişli ola bilər.
Bununla yanaşı, məsafədən işin üstünlükləri və çatışmazlıqları da nəzərə alınmalıdır. İşə gedib-gəlməyə vaxt sərf etməmək və bəzi hallarda iş saatlarını daha sərbəst planlaşdırmaq bu modelin əsas üstünlüklərindəndir.
2. Bacarıqlarınıza uyğun iş seçin
Məsafədən iş axtararkən şəxsi bilik, təcrübə və peşə bacarıqlarına uyğun vakansiyalara üstünlük verilməsi tövsiyə olunur.
Uyğun iş imkanlarını tapmaq üçün vakansiya platformalarından və peşəkar əlaqələrdən istifadə etmək olar.
3. CV və motivasiya məktubunu düzgün hazırlayın
İşə müraciət etməzdən əvvəl vakansiyanın tələbləri diqqətlə öyrənilməlidir. CV və motivasiya məktubu həmin vəzifə üçün tələb olunan texniki bilikləri və şəxsi bacarıqları əks etdirməlidir.
Bundan başqa, müraciət edilən şirkətin fəaliyyəti və dəyərləri haqqında əvvəlcədən məlumat toplamaq namizədin işə uyğunluğunu daha yaxşı təqdim etməsinə kömək edə bilər.
4. İş müraciətini düzgün edin və nəticəsini izləyin
Namizədlər vakansiyada göstərilən müraciət qaydalarına əməl etməlidirlər. Bu, elektron poçt vasitəsilə CV göndərməyi və ya şirkətin müəyyən etdiyi digər mərhələlərdən keçməyi əhatə edə bilər.
“Indeed” müraciətdən sonra münasib müddətdə, adətən iki həftə ilə bir ay arasında işəgötürənlə yenidən əlaqə saxlamağı da tövsiyə edir. Bu addım namizədin vəzifəyə marağını göstərə bilər.
Platforma vurğulayır ki, məsafədən iş axtarışında əsas məqsəd yalnız evdən işləmək imkanı əldə etmək deyil, həm də şəxsin bacarıqlarına və həyat tərzinə uyğun iş seçmək olmalıdır.
