Neft qiymətləri Yaxın Şərqdə gərginlik fonunda dördüncü ay yüksəlir

Neft qiymətləri Yaxın Şərqdə gərginliyin artması və Səudiyyə Ərəbistanının infrastrukturuna hücumlarla bağlı narahatlıqlar fonunda ardıcıl dördüncü ayı yüksəlişlə başa vurmağa doğru gedir. Bu barədə BusinessTime "OilPrice"a istinadən xəbər verir.

Material hazırlanarkən Brent markalı neftin bir bareli 116,56 ABŞ dollarına, WTI markalı neft isə 103,35 ABŞ dollarına satılıb. "Reuters"in məlumatına görə, ay ərzində Brent 11 faiz, WTI isə 14 faiz bahalaşıb.

İyunun sonundan Brent markalı neftin bir barelinin qiyməti 40 ABŞ dollarından çox, WTI-nin qiyməti isə təxminən 34 ABŞ dolları artıb. Qiymətlər həftəni də yüksəlişlə başa vurmağa doğru gedir.

ABŞ prezidenti Donald Tramp noyabrın 3-də keçiriləcək aralıq seçkilərdən sonra İrana qarşı zərbələrin bərpa oluna biləcəyini dəfələrlə bildirib. Media həmçinin ABŞ və İsrailin mümkün zərbələrlə bağlı əlaqələndirmə apardığını yazıb. Hörmüz boğazında tankerlərə hücumlar və husilərin Səudiyyə Ərəbistanının neft obyektlərinə yeni hücumları barədə xəbərlər də bazara təsir göstərib.

"Saxo Bank"ın əmtəə strategiyası üzrə rəhbəri Ole Hansen bildirib ki, alternativ marşrutlar və logistika dəyişiklikləri sayəsində Fars körfəzindən xam neft ixracı davamlılığını nisbətən qoruyub. Bununla belə, bazarda yeni hücumların hasilat, emal və ya ixrac infrastrukturuna zərər vuraraq daşımaların marşrutunu dəyişməklə asanlıqla aradan qaldırılmayan fasilələr yarada biləcəyi ilə bağlı narahatlıq artır.