Həqiqət kölgədə qalmamalıdır: Xeyirxahlığı hədəfə almaq cəmiyyətə xidmət etmir!

Son günlər bəzi xəbər portallarında "Magen David Azərbaycan"ın təsisçisi, beynəlxalq hüquq müdafiəçisi David Seliverstov haqqında həqiqəti əks etdirməyən məlumatların yayılması ictimaiyyətdə təəssüf hissi doğurur. İnformasiya əsrində hər bir məlumatın böyük sürətlə yayılması fonunda xüsusilə insanın nüfuzuna və uzun illər ərzində formalaşdırdığı ictimai fəaliyyətinə xələl gətirə biləcək iddiaların dəqiq araşdırılmadan təqdim edilməsi həm peşəkar jurnalistikanın prinsiplərinə, həm də cəmiyyətin informasiya təhlükəsizliyinə ziddir.

İllərdir müxtəlif sosial layihələrdə, humanitar təşəbbüslərdə və xeyriyyə aksiyalarında fəal iştirak edən David Seliverstov fəaliyyətini daim insanlara dəstək göstərmək üzərində qurub. O, təkcə beynəlxalq hüquq müdafiəçisi kimi deyil, eyni zamanda sosial məsuliyyət hissi ilə seçilən bir ictimai xadim kimi tanınır.

Onun fəaliyyətində xüsusi yer tutan istiqamətlərdən biri şəhid ailələrinə və Vətən müharibəsi qəhrəmanlarının övladlarına göstərilən diqqət və qayğıdır. Müxtəlif dövrlərdə təşkil olunan görüşlər, bayram tədbirləri, sosial dəstək layihələri və humanitar aksiyalar yüzlərlə ailəyə mənəvi dayaq olmaq məqsədi daşıyıb. Şəhid övladlarının sevincinə şərik olmaq, onların təhsilinə, inkişafına və sosial rifahına töhfə vermək yalnız xeyriyyəçilik deyil, həm də vətəndaşlıq məsuliyyətinin ən ali nümunələrindən biridir.

David Seliverstov hər zaman Azərbaycanın dövlət maraqlarına hörmətlə yanaşan, ölkənin milli maraqlarını dəstəkləyən mövqe nümayiş etdirib. Onun müxtəlif platformalarda Azərbaycan həqiqətlərinin beynəlxalq ictimaiyyətə çatdırılması istiqamətində fəaliyyəti də diqqətdən kənarda qalmayıb.

Bu gün informasiya məkanında hər hansı şəxs barədə ittiham xarakterli məlumat yayılarkən ən vacib prinsip faktlara söykənmək, qarşı tərəfin mövqeyini öyrənmək və obyektivliyi qorumaqdır. Əks halda yayılan əsassız iddialar təkcə bir insanın nüfuzuna deyil, həm də cəmiyyətin informasiya mühitinə zərbə vurur.

Azərbaycan cəmiyyəti hər zaman xeyirxahlığı, vətənpərvərliyi və sosial məsuliyyəti yüksək qiymətləndirib. Şəhid ailələrinin yanında olan, aztəminatlı insanlara dəstək göstərən, müxtəlif humanitar layihələr həyata keçirən insanların fəaliyyəti qiymətləndirilməli, onların gördüyü işlər kölgədə qoyulmamalıdır.

Unutmaq olmaz ki, tənqid də, jurnalistika da faktlara əsaslanmalıdır. Əgər hər hansı iddia irəli sürülürsə, onun hüquqi və faktiki əsası olmalıdır. Əks halda dezinformasiyanın yayılması həm etik normalara, həm də qanunun tələblərinə uyğun hesab edilə bilməz.

Bu gün cəmiyyəti birləşdirən əsas dəyərlərdən biri xeyirxahlıqdır. İnsanların həyatına müsbət təsir göstərən təşəbbüslər, xüsusilə şəhid ailələrinə və övladlarına göstərilən diqqət siyasi və ya şəxsi maraqların predmetinə çevrilməməlidir. Belə fəaliyyətlər cəmiyyətin həmrəyliyini gücləndirən, milli birliyi möhkəmləndirən amillərdir.

Həqiqət isə gec-tez öz yerini tapır. Ona görə də ictimai rəy formalaşdıran hər bir media orqanı məsuliyyət hissi ilə hərəkət etməli, yoxlanılmamış məlumatların yayılmasından çəkinməli, obyektivlik və peşəkarlıq prinsiplərinə sadiq qalmalıdır. Cəmiyyət isə insanların fəaliyyətinə hökm verərkən emosiyalara deyil, faktlara və real əməllərə əsaslanmalıdır.

Aslan Abbaszadə
FaktorNews xəbər portalının Təsisçisi və Baş Redaktoru