Metronun yeni açılacaq stansiyası üçün adlar hökumətə təqdim edilib - EKSKLÜZİV
“Bakı Metropoliteni” QSC-nin 2025-ci ildə açılacaq şərti adı “B-04” olan 28-ci stansiyası üçün adlar Nazirlər Kabineti yanında adlar komissiyasına göndərilib.
BusinessTime-ın əldə etdiyi məlumata görə, ümumilikdə 6 ad təqdim edilib.
Belə ki, qaydalara görə, əgər xüsusi tapşırıq olmazsa stansiya yerləşdiyi küçənin və ya yaxınlıqdakı mühüm dövlət əhəmiyyətli müəssisənin adı ilə adlanmalıdır.
Bu baxımdan komissiyaya stansiyanın yerləşdiyi Cəlil Məmmədquluzadə, həmçinin yaxınlıqdakı Akademik Həsən Əliyev və Abbasqulu Ağa Bakıxanov küçələrindən birinin adının verilməsi təklif edilib.
Bundan əlavə “B-04” metrostansiyası Heydər Əliyev adına İdman-Konsert Kompleksinin, Azərbaycan Tibb Universitetinin və 1 saylı Şəhər Kliniki Xəstəxanasının yaxınlığında yerləşdiyi üçün onlara uyğun adların qoyulması da təklif edilib.
Məlumata görə, Adlar Komissiyası ilin sonuna qədər özündə olan təkliflər də daxil olmaqla bütün təkliflərə baxacaq və yeni adı açıqlayacaq.
Qeyd edək ki, Cəlil Məmmədquluzadə küçəsində yerləşən "B-04" stansiyası Bənövşəyi xəttin sayca 4-cü stansiyasıdır.
Qeyd edək ki, Cəlil Məmmədquluzadə küçəsində yerləşən "B-04" stansiyası Bənövşəyi xəttin sayca 4-cü stansiyasıdır.
