Nazirlik reseptlərlə bağlı əhaliyə müraciət edib

Nazirlər Kabinetinin 2023-cü il 14 aprel tarixli Sərəncamına əsasən, Səhiyyə Nazirliyi 2024-cü may 1-dən etibarən ölkədə səhiyyə sahəsində rəqəmsallaşdırma çərçivəsində önəmli addımlardan olan Elektron Resept Platformasını istifadəyə verib.

Səhiyyə Nazirliyinin mətbuat xidmətindən verilən məlumata görə, kağız blanklar üzərində əl ilə yazılan reseptlərdən fərqli olaraq, elektron reseptin itirilməsi, zədələnməsi mümkün deyil. Elektron reseptlərdə yalnız dövlət qeydiyyatından keçən və qiymətləri Tarif Şurası tərəfindən təsdiqlənən dərman preparatlarının təyini edilməsi və apteklər tərəfindən satışı nəzərdə tutulur. Bu da, öz növbəsində, əhaliyə keyfiyyətsiz və vaxtı ötən dərman preparatlarının satışının qarşısını alır, eyni zamanda, şəffaf qiymətləndirmə ilə yanaşı, onların istehlakçı hüquqlarının qorunmasına xidmət edir.

Səhiyyə Nazirliyi vətəndaşları öz istehlakçı hüquqlarının qorunması naminə, reseptlərinin təyin və təmin olunması zamanı ilə bağlı bu prosesləri “Elektron resept” tətbiqi vasitəsilə aparılması üçün təşəbbüs göstərməyə və buna əməl etmələri üçün həm təyin edən tibb işçiləri, həm də əczaçılardan tələb etməyə çağırır.

Buna əməl edilmədiyi təqdirdə, vətəndaşların Səhiyyənin İnformasiyalaşdırma Mərkəzinin nəzdində fəaliyyət göstərən “Qaynar xətt” nömrələri ilə (099412-431-38-28; 099455 531-38-28 (“WhatsApp”)) əlaqə saxlamağı tövsiyə edilir.