Türk Dünyası Mediatorlar Birliyi Bakıda görüşlər keçirir
Azərbaycanda səfərdə olan Türk Dünyası Mediatorlar Birliyinin nümayəndə heyəti ilə Azərbaycan Respublikasının Diasporla İş üzrə Dövlət Komitəsində görüş keçirilib.
Görüşü açıq elan edən Komitə sədrinin birinci müavini Valeh Hacıyev komitənin tarixi, fəaliyyət istiqamətləri və həyata keçirdiyi layihələr, Türk Dövlətləri Təşkilatı çərçivəsində görülən işlər barədə məlumat verib.
Azərbaycan Respublikası Mediasiya Şurasının İdarə Heyətinin sədri Nadir Adilov Prezident İlham Əliyevin rəhbərliyi ilə aparılan mütərəqqi məhkəmə-hüquq islahatları çərçivəsində mübahisələrin məhkəmədənkənar həllində və məhkəmələrin iş yükünün azaldılmasında mühüm vasitə olan mediasiya institutunun qurulması və təşviqi üzrə mühüm tədbirlər görülməsi və bu sahədəki islahatlardan söz açıb.
Türk Dünyası Mediatorlar Birliyinin başqanı Yakup Erikel qurumun yaradılmasının tarixi və məqsədlərindən, türk dövlətləri arasındakı inteqrasiya proseslərinin dərinləşməsinin mediasiya fəaliyyətinə təsirindən danışıb.
Birliyin İdarə Heyətinin üzvləri Saliha Sasa, Hatice İpek, Eda Günday, Serpil Akdeniz və Hüseyn İlham Yetişgin səmimi qəbula görə təşəkkür ediblər.
Görüşdə türk dövlətlərində Azərbaycan və türk diasporlarının birgə əməkdaşlığı nəticəsində mediasiya təşkilatlarının və mediasiya qurumlarının da diasporla bağlı məsələlərə cəlb edilməsi, Qarabağda təşkil olunması planlaşdırılan Türk Dünyası Mediatorlar Birliyinin geniş toplantısında hər iki ölkənin diaspor məsələlərinə məsul qurumlarının iştirakının təmin edilməsi və digər məsələlər müzakirə olunub.
Xarici ölkələrdə yaşayan Azərbaycan vətəndaşlarının hüquqi vəziyyətini və onların hüquqi müdafiəsini yaxşılaşdıran müqavilə-hüquq bazasının təkmilləşdirilməsi, dövlət orqanlarında ictimai iştirakçılığın genişləndirilməsi, xaricdə yaşayan yetkinlik yaşına çatmayanların baxımsızlığı ilə mübarizə və onların reabilitasiyası, 1990-cı illərdən etibarən Türkiyə Respublikasına (İstanbul şəhərinə) mühacirət etmiş və hazırda orada qeyri-qanuni yaşayan Azərbaycan Respublikasının vətəndaşı olması ehtimal olunan şəxslərlə bağlı problemlərin həlli, Ermənistanın təcavüzü nəticəsində qaçqın və məcburi köçkün düşmüş şəxslərin, eyni zamanda Qərbi azərbaycanlıların pozulmuş hüquqlarının bərpası, onlara dəymiş maddi və mənəvi ziyanın ödənilməsi, habelə tarixi və mədəni sərvətlərimizin dağıdılması faktarına baxılması və beynəlxalq təşkilatlarda qaldırılması istiqamətində əməkdaşlığın qurulması razılaşdırılıb.
Sonda birgə xatirə fotosu çəkilib.
