“Aqroservis” mexanizatorlarla görüşlərə başlayıb
Kənd Təsərrüfatı Nazirliyi “Aqroservis” ASC tərəfindən 2024-cü il taxıl biçininə hazırlıqla bağlı biçinini həyata keçirəcək mexanizatorlarla görüşlər təşkil edilib.
İlk görüş Yevlax və Şəki rayonlarında keçirilib. Tədbirdə “Aqroservis” ASC-nin və ətraf rayonların Dövlət Aqrar İnkişaf Mərkəzlərinin (DAİM) rəhbərləri, Cəmiyyətin regional nümayəndəliklərinin və rayon bölmələrinin əməkdaşları, texniki nəzarət müfəttişləri, mühəndislər və mexanizatorlar iştirak edib. Tədbirin təşkilində əsas məqsəd cari ildə taxıl biçinini itkisiz və mütəşəkkil həyata keçirməkdir.
Görüşlərdə biçin zamanı qarşıya çıxa biləcək çətinliklər, onların həlli yolları müzakirə edilib və mexanizatorların təklifləri dinlənilib. Görüşlərin digər rayonları da əhatə etməklə biçinin başlanmasınadək davam etdirilməsi nəzərdə tutulur.
Görüşlərdən əvvəl mexanizatorlar üçün təlimlər təşkil edilib. Aprel ayının ilk həftəsindən başlayan təlimlər “Aqroservis” ASC-nin Yevlax təlim-tədris mərkəzi və Masallı DAİM-də təşkil edilib. Təlimlərdə müxtəlif markalı, əsasən CLAAS, New Holland TC 5.90 HillSide, New Holland TC 4.90 və TC 5.80 və SAMPO markalı kombaynların idarə edilməsi ilə bağlı məlumatlar verilib.
Hər il ənənəvi olaraq təşkil edilən təlimlərin əsas məqsədi taxıl biçininin itkisiz və mütəşəkkil həyata keçirilməsi, mexanizatorlar tərəfindən texnikaların idarə edilməsi, kombyanlara texniki xidmətin göstərilməsi, istismar zamanı baş verə biləcək nasazlıqların aradan qaldırılması və təhlükəsizlik qaydalarına düzgün riayət edilməsi ilə bağlı onların bilik və bacarıqlarının artırılmasıdır.
