"Gelandewagen"in Dubay variantı təqdim edildi
BƏƏ-nin Dubay şəhərində yerləşən "Venuum" tüninq studiyası yeni layihəsi - "Mercedes-AMG G63" üçün modifikasiya dəstinin şəkillərini yayımlayıb.
Oxu.Az auto.ru-ya istinadən xəbər verir ki, tüninqdən sonra avtomobil "Mastodon" adlandırılıb.
Bu "Mastodon"lardan yalnız 50-si istehsal olunacaq. Layihənin dəyəri açıqlanmayıb.
Avtomobilin görünüşündə ən nəzərəçarpan dəyişiklik yeni faralardır. Tünerlər standart dəyirmi faraları xüsusi hazırlanmış korpuslarda yerləşdirilmiş düzbucaqlı faralarla əvəz ediblər. Avtomobilin ön hissəsi nəhəng hava girişləri və alternativ bamper, eləcə də studiyanın loqosu ilə fərqlənən radiator barmaqlığı ilə bəzədilib.
Arxa işıqlar da dəyişdirilib, tavana işıq zolağı və spoyler əlavə olunub. Salon yeni dəri ilə üzlənib və qeyri-adi naxışlarla bəzədilib.
