Banklara xidmət göstərən şirkətlərə hücumda 16 mindən çox müştərinin məlumatı yayılıb

Hakerlərin yaydığı fayllarda 16 mindən çox müştərinin və 124 bank əməkdaşının elektron poçt ünvanları aşkarlanıb. Məlumatların həqiqiliyi müstəqil təsdiqlənməyib.

Banklara xidmət göstərən şirkətlərə hücumda 16 mindən çox müştərinin məlumatı yayılıb
Foto: Reuters

“JPMorgan Chase”, “Visa” və “Mastercard”a xidmət göstərən şirkətlərə kiberhücumdan sonra yayılan fayllarda 16 mindən çox müştərinin məlumatı aşkarlanıb. Bu barədə BusinessTime “Reuters”ə istinadən xəbər verir.

Noyabrın 19-da yayılan məlumata görə, agentliyin araşdırdığı fayllarda müştərilərlə yanaşı, 124 bank əməkdaşının da elektron poçt ünvanları yer alıb. Bəzi qeydlərdə telefon nömrələri və poçt indeksləri də olub. “Reuters” məlumatların həqiqiliyini müstəqil şəkildə təsdiqləyə bilməyib.

“JPMorgan Chase” hakerlərin bankın əsas sistemlərinə deyil, xidmət təminatçılarında saxlanılan marketinq məlumatlarına çıxış əldə etmiş ola biləcəyini açıqlayıb. Bank təsirlənən müştərilərlə əlaqə saxlayacağını, zəruri hallarda onlara pulsuz kredit monitorinqi xidməti təklif edəcəyini bildirib.

“Visa” Asiya-Sakit okean regionundakı xidmət təminatçılarından birində təhlükəsizlik pozuntusunu təsdiqləyib. Şirkətin məlumatına görə, öz sistemləri zərər görməyib, kart nömrələri və ödəniş məlumatları ələ keçirilməyib. “Mastercard” isə imtiyaz proqramlarından birinə qoşulmuş məhdud sayda müştərinin elektron poçt ünvanlarının sızdığını bildirib. Şirkətin ödəniş şəbəkəsi normal işləyir.

“n0n” adlı haker qrupu şirkətlərlə əlaqəli olduğunu iddia etdiyi faylları yayaraq hücuma görə məsuliyyəti üzərinə götürüb. Qrup 2026-cı ilin sentyabrından bəri təxminən 200 kiberhücum etdiyini iddia edir. “JPMorgan Chase” isə noyabrın 16-da pul köçürmələrində gecikmələrə səbəb olan proqram xətasının kiberhücumla əlaqəsi olmadığını açıqlayıb.