İspaniyanın nəqliyyat naziri 69 nəfərin öldüyü qəzadan sonra istefa verib

İspaniyanın nəqliyyat naziri Oskar Puente Urda şəhəri yaxınlığında 69 nəfərin ölümü ilə nəticələnən dəmir yolu qəzasından altı gün sonra istefa verib. Bu barədə BusinessTime "BBC Rus xidməti"nə istinadən xəbər verir.

Nazir qərarını parlamentdə iki qatarın toqquşması ilə bağlı hesabat təqdim edərkən açıqlayıb. O, bir ildən az müddətdə iki ağır qəzanın baş verdiyi şəraitdə nəqliyyat nazirinin vəzifədə qala bilməyəcəyini bildirib.

Oktyabrın 28-də Madrid–Sevilya xəttində dövlətə məxsus "Renfe" şirkətinin yüksək sürətli qatarı yolda dayanmış "Iryo" qatarına çırpılıb. Madridin təxminən 100 kilometr cənubunda baş vermiş qəzada 69 nəfər ölüb, onlarla insan yaralanıb.

Puente oktyabrın 30-da müxalifətin istefa tələblərinə cavab olaraq vəzifəsindən getmək niyyətində olmadığını demişdi. O, həmin vaxt əsas vəzifəsinin öz mövqeyini müzakirə etmək deyil, problemi həll etmək olduğunu bildirmişdi. Bununla belə, nazir sonradan parlamentdə istefa qərarını qəzanın baş verdiyi gün — oktyabrın 28-də verdiyini deyib.

Nazirin istinad etdiyi digər qəza yanvarın 18-də İspaniyanın cənubundakı Əndəlus bölgəsinin Adamus şəhərində baş verib. Həmin hadisədə də "Renfe" və "Iryo" qatarları toqquşub, 46 nəfər ölüb, 200-dən çox insan xəsarət alıb.