Türkiyə COP31-də dörd inkişaf bankı ilə 5,1 milyard dollarlıq saziş bağlayıb

Türkiyə Antalyada keçirilən COP31 iqlim sammitində dörd çoxtərəfli inkişaf bankı ilə 5,1 milyard ABŞ dolları dəyərində 10 saziş imzalayıb. Bu barədə BusinessTime "Anadolu" agentliyinə istinadən xəbər verir.

Türkiyənin maliyyə naziri Mehmet Şimşək sazişlər barədə cümə axşamı keçirilən imzalanma mərasimində məlumat verib. Onun sözlərinə görə, maliyyə vəsaiti məşğulluğu, sənayenin müasirləşdirilməsini, yaşıl və rəqəmsal keçidi dəstəkləyən layihələrə yönəldiləcək. Sazişlər Asiya İnkişaf Bankı, Asiya İnfrastruktur İnvestisiya Bankı, Dünya Bankı və İslam İnkişaf Bankı ilə bağlanıb.

Asiya İnkişaf Bankının prezidenti Masato Kanda fəlakətlərə davamlı xəstəxanaların tikintisi, səhiyyə xidmətlərinin gücləndirilməsi və həkimlərin hazırlanması üçün 620 milyon avroluq (687 milyon ABŞ dolları) saziş bağlandığını açıqlayıb. Bank daha 500 milyon ABŞ dollarını "VakıfBank" vasitəsilə kiçik biznesin uzunmüddətli maliyyələşdirilməsinə ayıracaq. Vəsaitin xüsusilə az inkişaf etmiş və zəlzələdən zərər çəkmiş vilayətlərə, eləcə də qadın sahibkarlara yönəldilməsi nəzərdə tutulur. Mehmet Şimşəyin sözlərinə görə, sazişlərdən sonra Asiya İnkişaf Bankının maliyyə dəstəyi 3,1 milyard ABŞ dollarına çatacaq.

Asiya İnfrastruktur İnvestisiya Bankı 1,9 milyard ABŞ dolları ayıracağını açıqlayıb. Bunun 1,6 milyard ABŞ dolları Türkiyənin iqlim fəaliyyəti proqramına və əlavə maliyyələşdirməyə, 300 milyon ABŞ dolları isə "Türk Eximbank" vasitəsilə müəssisələrin yaşıl keçidinə və iqtisadi şoklara davamlılığına yönəldiləcək.

Dünya Bankı Qrupunun prezidenti Ajay Banga ümumi dəyəri 1,5 milyard ABŞ dolları olan üç sazişin şəhərləri, kənd təsərrüfatını və sənayeni dəstəkləyəcəyini deyib. Bu məbləğə qurumun cəlb etməyə çalışdığı əlavə özəl investisiyalar daxil deyil. Onun sözlərinə görə, qrupun Türkiyədəki portfeli 32 milyard ABŞ dollarına çatıb.

Mehmet Şimşək bildirib ki, Türkiyə 2023-cü ildən bəri inkişaf tərəfdaşlarından təxminən 50 milyard ABŞ dolları xarici maliyyə cəlb edib. Bu vəsait zəlzələdən sonra yenidənqurma, dəmir yolları, bərpa olunan enerji, ixracatçılar və kiçik biznes daxil olmaqla müxtəlif sahələrə yönəldilib.