"Anthropic" səhmlərinin birjaya çıxarılmasından 64 milyard dollar cəlb edəcək
"Anthropic" bu ay səhmlərini "Nasdaq" birjasında satışa çıxarmağı planlaşdırır. Təklif olunan qiymət şirkəti 1,1–1,3 trilyon ABŞ dolları həcmində dəyərləndirir.
"Claude" çatbotunu hazırlayan "Anthropic" bu ay səhmlərini Nyu-Yorkun "Nasdaq" birjasında satışa çıxararaq 64 milyard ABŞ dollarınadək vəsait cəlb etməyi planlaşdırır. Bu barədə BusinessTime "BBC Business"ə istinadən xəbər verir.
Şirkət hər səhm üçün 70–78 ABŞ dolları qiymət aralığı müəyyənləşdirib. Bu qiymətlər əsasında zərərlə işləyən şirkətin dəyəri 1,1–1,3 trilyon ABŞ dolları arasında qiymətləndirilir. Göstərici bəzi analitiklərin həftələr əvvəl irəli sürdüyü 2 trilyon ABŞ dolları proqnozundan aşağıdır.
Səhmlərin satışa çıxarılması süni intellekt şirkətləri üçün qeyri-sabit dövrə təsadüf edir. ABŞ-da ötən həftə keçirilən aralıq seçkilərdən sonra demokratların rəhbərlik etdiyi Konqresin süni intellektin inkişafını və məlumat mərkəzlərinin qurulmasını ləngidə biləcəyi ilə bağlı narahatlıqlar fonunda "Nasdaq" kəskin azalıb. Sahəyə xərclənən milyardlarla dolların özünü doğruldub-doğrultmayacağı da suallar doğurur.
"City Index"in baş bazar analitiki Fiona Sinkotta "Reuters"ə bildirib ki, 64 milyard ABŞ dolları cəlb etmək hədəfi son dövrlərdəki bazar dəyişkənliyi və süni intellektlə bağlı narahatlıqlar fonunda nikbin yanaşmanı göstərir. Onun sözlərinə görə, bu, şirkətin sahənin perspektivlərinə və tələbatın mövcud olacağına inandığını göstərir.
"Anthropic"in iyunun sonunadək altı aylıq dövrdə gəlirləri əvvəlki ilin eyni dövründəki 1,1 milyard ABŞ dollarından 16,2 milyard ABŞ dollarına yüksəlib. Şirkətin vergidən əvvəl zərəri isə 12,9 milyard ABŞ dollarından 80,7 milyard ABŞ dollarına çatıb.
