Son 1 ildə “Zərifə Əliyeva” gəmi-bərəsi ilə bu qədər daşıma həyata keçirilib

Son 1 ildə “Zərifə Əliyeva” gəmi-bərəsi ilə bu qədər daşıma həyata keçirilib

Bir il bundan öncə istismara verilən Ro-Pax tipli “Zərifə Əliyeva” gəmi-bərəsi bu günə qədər 163 səfər həyata keçirilib.

BusinessTime xəbər verir ki, gəmi “Azərbaycan Xəzər Dəniz Gəmiçiliyi" QSC-nin (ASCO) sifarişi ilə Bakı Gəmiqayırma Zavodunda inşa olunub.
Bu səfərlər çərçivəsində 148 vaqon, 1061 ədəd minik avtomobili, 5 595 ədəd yük avtomobili/TIR, 5 616 nəfər sərnişin daşınıb.

“Zərifə Əliyeva” gəmisi ilə səfərlər Aktau-Ələt, Ələt-Aktau, Türkmənbaşı-Ələt, Ələt-Türkmənbaşı, Kurık-Ələt, Ələt-Kurık istiqamətləri üzrə həyata keçirilib.

Daimi heyəti 30 nəfərdən ibarət unikal bərənin uzunluğu 154,50, eni 17,7, bortunun hündürlüyü isə 7,5 metrdir. 100 nəfər sərnişin, 56 sistern tipli vaqon və ya 50 yük avtomobili/TIR daşımaq imkanına malikdir.

“Zərifə Əliyeva” gəmi-bərəsi Transxəzər Beynəlxalq Nəqliyyat Marşrutu üzrə yükdaşıma zəncirinin mühüm həlqəsi olan ASCO-nun digər bərələri ilə birgə yükdaşımalara, eləcə də əlverişli coğrafi mövqeyə malik ölkəmizin tranzit potensialının reallaşdırılmasına mühüm töhfə verir.

ASCO-nun Dəniz Nəqliyyatı Donanmasına məxsus bu gəmi-bərənin “Zərifə Əliyeva” adlandırılması Azərbaycan dənizçilərinin görkəmli alim və həkim, tibb elmləri doktoru, professor, Əməkdar elm xadimi, akademik Zərifə Əliyevanın xatirəsinə olan sonsuz ehtiramının ifadəsidir.

Qeyd edək ki, gəmi-bərə 2022-ci ilin aprelin 28-də Azərbaycan Prezidenti İlham Əliyevin iştirakı ilə istismara verilib.