Rusiyanın “Beget” şirkətinə kiberhücum bulud məlumatlarını sildi

Rusiyanın hostinq şirkəti "Beget" bazar gününə keçən gecə baş vermiş kiberhücum nəticəsində bulud infrastrukturundakı məlumatların silindiyini və yüzlərlə saytın fəaliyyətinin pozulduğunu açıqlayıb. Bu barədə BusinessTime "The Record"a istinadən xəbər verir.

Şirkət çərşənbə günü bəzi serverlərin yenidən işə salındığını bildirsə də, xidmətlərin tam bərpasının xeyli vaxt aparacağını qeyd edib. Bunun üçün 1 000-dən çox server ayrı-ayrılıqda və əl ilə yoxlanılmalıdır. Mühəndislər zərərli faylları silməyə və məlumatların bütövlüyünü yoxlamağa davam edirlər.

"Beget"in məlumatına görə, hücumçular infrastrukturun idarə edilməsi sistemlərinə giriş əldə edərək məlumatları silmək üçün skriptlər işə salıblar. Virtual şəxsi serverlər, bulud yaddaşı və "Kubernetes" xidmətləri ilə bağlı məlumatlar silinib. Virtual serverlərin bütün ikili ehtiyat nüsxələri də itirilib, lakin fayl səviyyəsində ehtiyat nüsxələri saxlanılıb və onlardan bəzi məlumatların bərpası üçün istifadə oluna bilər.

Şirkət ümumi hostinq infrastrukturunda yerləşən saytların demək olar ki, hamısının bərpa edilə biləcəyini ehtimal edir. Müştərilərin birbaşa idarə etdiyi ayrılmış serverlər isə artıq bərpa olunub. Yerli medianın məlumatına görə, fasilə əsasən onlayn mağazalarını və korporativ saytlarını "Beget"də yerləşdirən kiçik və orta biznesə təsir göstərib.

"Beget" müştəri məlumatlarının yerləşdiyi serverlərdən informasiyanın yüklənməsi və ya dəyişdirilməsi cəhdinə dair sübut aşkar etmədiyini bildirib. Bununla belə, şirkət təsirlənmiş sistemlərdə saxlanmış ola biləcək parolların və giriş açarlarının dəyişdirilməsini tövsiyə edib. Hücumçuların ilkin giriş üsulu açıqlanmayıb, heç bir haker qrupu da məsuliyyəti üzərinə götürməyib.

2007-ci ildə yaradılan "Beget" hostinq, domen qeydiyyatı və bulud xidmətləri göstərir. "Kommersant"ın istinad etdiyi məlumatlara görə, şirkət oktyabrda təxminən 540 700 .RU domenini idarə edib və bu bazarın 14,7 faizini tutub.