Visa Azərbaycanda ilk dəfə bunu tətbiq edir
Bu texnologiya sərnişinin ictimai nəqliyyatda gün ərzində etdiyi bütün gedişləri cəm etməyə və onların toplam dəyərini günün sonunda sərnişinin hesabından birdəfəlik silməyə, eləcə də təmassız ödənişləri bank kartları və ya NFC modullu cihazlar (smartfonlar və ağıllı saatlar) vasitəsilə həyata keçirməyə imkan verir
Visa şirkəti Azərbaycanda ilk dəfə Mobility & Transit Transaction (MTT, “mobillik və tranzit əməliyyatları”) texnologiyasını tətbiq edəcək. Bu texnologiya sərnişinin ictimai nəqliyyatda gün ərzində etdiyi bütün gedişləri bir əməliyyatda birləşdirməyə və onu günün sonunda sərnişinin hesabından birdəfəlik silməyə imkan verir. Hazırda bu xidmət ADY-nin Bakı dairəvi dəmir yolunda müyəssərdir – onun 14 stansiyasının hamısında təmassız oxuyucu cihazları ilə təchiz edilmiş turniketlər quraşdırılıb.
Sərnişinlər gediş haqqını bank kartları, eləcə də rəqəmsal pul kisələrinə bağlı olan NFC modullu cihazlar – smartfonlar, ağıllı saatlar və ödəmə üzükləri vasitəsilə ödəyə bilərlər. Visa bu layihəni “Azərbaycan Dəmir Yolları” (ADY), Azərbaycan Respublikasının Mərkəzi Bankı, Azərbaycan Beynəlxalq Bankı, IBA Group, RBC Group və “Azerikard” MMC ilə tərəfdaşlıqda icra edib.
MTT modeli nəqliyyat operatorlarına çevik tarif siyasəti tətbiq edərək qiymətqoymanı çeşidləməyə, o cümlədən sabit tariflər, məsafə və vaxt əsasında tariflər, multimodal (bir neçə nəqliyyat növü üçün) tariflər, eləcə də tarif məhdudiyyətləri, güzəştlər və gecikmə üçün vəsaitin qaytarılması kimi əlavə funksiyalar təklif etməyə imkan verir.
Visa-nın apardığı qlobal tədqiqatlar göstərir ki, böyük şəhərlərdəki istehlakçıların 27%-i ödəmə daha asan olduğu təqdirdə ictimai nəqliyyatdan daha tez-tez istifadə etməyə hazırdır. MTT ictimai nəqliyyatda gediş haqlarının odənilməsi üçün səmərəli, rahat və inklyuziv bir üsuldur, onun təklif etdiyi əməliyyatların yüksək sürəti isə sərnişinlərə ictimai nəqliyyat vasitələrinə cəld girib-çıxmağa kömək edir.
“Biz əminik ki, rahat infrastruktur və “ağıllı nəqliyyat” ölkə iqtisadiyyatının artımı, müasir şəhərlərin inkişafı üçün başlıca amillər sırasındadır. Komandamız Visa kart sahiblərinə multimodal səfərlər, yəni gün ərzində müxtəlif nəqliyyat növlərindən istifadə zamanı ən rahat istifadəçi təcrübəsini təqdim etmək üçün çalışır. Bu məqsədlə biz ayrıntısız ekosistem yaradırıq ki, burada nağd ödəniş etmək, hər nəqliyyat növü üçün ayrıca bilet almaq və ya bir neçə tətbiq yükləmək lüzumu qalmasın. 2018 ildən etibarən Visa bütün dünyada şəhər mobilliyi sahəsində 650-dən çox layihədə fəal iştirak edib, eləcə də 280 layihədə təmassız gediş haqqı ödənilməsi üzrə tərəfdaş olub. İndi biz bu yanaşmanı tərəfdaşlarımız ilə birlikdə Azərbaycanda inkişaf etdirməkdən çox məmnunuq. Ümid edirik ki, tezliklə bu texnologiya tək dəmir yollarında deyil, həm də Bakının istənilən ictimai nəqliyyat növündə əlçatan olacaq, sonra isə Azərbaycanın bütün bölgələrində tətbiq olunacaq,” – deyərək Kristina Doroş, Visa-nın Mərkəzi Asiya və Azərbaycan üzrə vitse-prezidenti və regional meneceri qeyd etdi.
Visa korporasiyası haqqında məlumat
Visa (NYSE: V) rəqəmsal ödənişlər sahəsində dünya lideridir və dünyanın 200-dən çox ölkə və ərazisində istehlakçılar, biznes, maliyyə və hökumət təşkilatları arasında həyata keçirilən maliyyə əməliyyatlarını dəstəkləyir. Missiyamız innovativ, rahat, etibarlı və təhlükəsiz ödəmə şəbəkəsi vasitəsilə dünyanı birləşdirməklə istehlakçıların rifahına xidmət etmək, biznes və iqtisadiyyat üçün davamlı inkişaf imkanlarını təmin etməkdir. Biz əminik ki, iqtisadi əlçatanlığın genişləndirilməsi dünyada hamının güzəranını yaxşılaşdırır və gələcəkdə pulların qlobal hərəkətinin əsasını təşkil edəcək. Daha ətraflı məlumatla Visa.com.az saytında tanış ola bilərsiniz visa.com.az.
