"WhatsApp" Android və iOS-da 2 QB-lıq pulsuz bulud yaddaşı təqdim edir
"WhatsApp" çatların ehtiyat nüsxələri üçün öz bulud yaddaşını istifadəyə verir. İstifadəçilərə ilkin olaraq 2 QB pulsuz yer ayrılır.
"WhatsApp" Android və iOS istifadəçiləri üçün çatların ehtiyat nüsxələrini saxlamağa imkan verən 2 QB-lıq pulsuz bulud yaddaşı təqdim edir. Bu barədə BusinessTime "WABetaInfo"ya istinadən xəbər verir.
Yeni xidmət "Google Drive" və "iCloud"a alternativ olacaq. İstifadəçilər çatlarının ehtiyat nüsxələrini "WhatsApp"ın serverlərində saxlamağı seçə biləcəklər. Bu serverlərdə saxlanılan nüsxələr giriş açarı və ya 64 rəqəmli şifrələmə açarı ilə standart olaraq başdan-başa şifrələnir.
Platforma Android və iOS-da qrup söhbətlərinin iştirakçı limitini də 1 024-dən 1 500-ə çatdırır. Mövcud qruplar avtomatik yenilənəcək və administratorların əlavə əməliyyat aparmasına ehtiyac qalmayacaq. Dəyişiklik artıq 2 000 nəfəri dəstəkləyən icma elanları qrupuna şamil edilmir.
Android üçün beta versiyada bəzi istifadəçilər mesajlara stikerlə reaksiya vermək imkanı əldə edirlər. Eyni mesaja bir neçə stiker əlavə etmək mümkündür. Bir mesaj üçün stiker reaksiyalarının sayı 20 ilə məhdudlaşdırılır.
Bundan başqa, "WhatsApp" Android və iOS-da söhbət mövzularının digər iştirakçılarla paylaşılmasını təqdim edir. Android üçün bu imkan beta versiyada yer alır. Paylaşılan mövzu fon şəklini və mesaj pəncərələrinin rəngini dəyişir. Qrup söhbətlərində istənilən iştirakçı mövzunu yeniləyə bilər.


