“Aztelekom”a 50 milyon dollar kredit ayrıldı
“Aztelekom” MMC-nin genişzolaqlı internet şəbəkəsinin genişləndirilməsi layihəsinin maliyyələşdirilməsi ilə bağlı “Aztelekom” MMC və Avropa Yenidənqurma və İnkişaf Bankı (AYİB) arasında 50 milyon ABŞ dolları (85 milyon AZN) dəyərində kredit müqaviləsi imzalanıb.
Rəqəmsal İnkişaf və Nəqliyyat Nazirliyindən (RİNN) bildirilib ki, sözügedən kredit müqaviləsini “Aztelekom”un baş direktoru Klaus Müller və AYİB-in Şərqi Avropa və Qafqaz ölkələri üzrə idarəedici direktoru Matteo Patron imzalayıblar.
Klaus Müller Azərbaycanın regionlarında təxminən 280 mindən çox ev təsərrüfatına ən müasir genişzolaqlı infrastrukturun tətbiqinə AYİB-in göstərdiyi dəstəyi yüksək qiymətləndirərək deyib: “Ölkəni əhatə edən genişzolaqlı internet şəbəkəsinin qurulması üçün hazırda RİNN tərəfindən həyata keçirilən “Onlayn Azərbaycan” layihəsinin əsas operatoru olan “Aztelekom”a AYİB-in dövlət zəmanəti olmadan kredit ayırması müsbət haldır. “Aztelekom” AYİB-in kreditorların qiymətləndirilməsinə dair mürəkkəb hüquqi ekspertiza prosesindən uğurla keçib. Bununla da maliyyə sağlamlığı, təhlükəsizlik, ekologiya, gender bərabərliyi və digər bu kimi sahələrə dair bankın ciddi tələblərinə cavab verərək ölkədə və regionda AYİB ilə kredit müqaviləsinin imzalanmasına nail olmuş azsaylı şirkətlərdən biri olub. Bu fakt özlüyündə 2021-2022-ci illərdə şirkətdə aparılan korporativ idarəetmə islahatlarının müsbət nəticəsinin bariz göstəricisidir”.
“Aztelekom” cəlb olunan maliyyə vəsaitini regionlarda həyata keçiriləcək infrastrukturun yenidən qurulması üçün istifadə edəcək. Bu maliyyə dəstəyi ilə şirkət planlaşdırdığı şəbəkə genişləndirilməsinin sürət, tutum və ötürmə qabiliyyətini yaxşılaşdıraraq, şəhər və kənd yerləri arasında rəqəmsal bərabərsizliyi azaltmağa nail olacaq. Bu, “Aztelekom”a yüksək keyfiyyətli, fasiləsiz interneti təmin etməyə və bütün ölkə üzrə internetin orta sürətini artırmağa imkan verəcək.
RİNN tərəfindən həyata keçirilən və əsas operatoru “Aztelekom” olan “Onlayn Azərbaycan” layihəsi çərçivəsində 2024-cü ilin sonuna qədər sürətli internetlə ölkənin bütün ərazisini əhatə edən genişzolaqlı şəbəkənin qurulması planlaşdırılır.
Layihə çərçivəsində mövcud ADSL avadanlığının müasir IMS platforması ilə işləyən GPON avadanlıqla əvəz edilməsi, köhnə mis magistral kabel infrastrukturunun optik kabellərlə əvəzlənməsi və optik paylayıcı şəbəkənin qurulması nəzərdə tutulur. Bu texnologiya mühüm dərəcədə internet xidmətinin keyfiyyətini yaxşılaşdırır, eləcə də İPTV və digər əlavə xidmətlər göstərməyə imkan yaradır.
Layihənin icrasına başlanıldığı 2017-ci ildən bu günədək artıq ölkə üzrə 766 minə yaxın ev təsərrüfatı optik internetə çıxış imkanı əldə edib ki, bunun da 539 mini 2021-2022-ci illərdə icra olunub. Bu, yeni infrastrukturun quraşdırılma tempinin dəfələrlə artdığını nümayiş etdirir. Ümumilikdə layihənin sonunadək ölkə ərazisində bütün ev təsərrüfatlarının GPON və digər genişzolaqlı texnologiyalar vasitəsilə sürətli internetlə təmin olunması planlaşdırılır.
