Meksika uçot dərəcəsini 6,25 faizə endirdi, Braziliya dəyişməz saxladı

Meksika Mərkəzi Bankı noyabrın 6-da uçot dərəcəsini 6,50 faizdən 6,25 faizə endirib, Braziliya Mərkəzi Bankı isə noyabrın 5-də dərəcəni 13,75 faiz səviyyəsində saxlayıb. Bu barədə BusinessTime "Note.com"a istinadən xəbər verir.

Meksikada qərar üç səs lehinə, iki səs əleyhinə olmaqla qəbul edilib. "Scotiabank"ın məlumatına görə, bazar iştirakçılarının əksəriyyəti dərəcənin dəyişməyəcəyini gözləyirdi. Qərarın əleyhinə səs verən iki sədr müavini 6,50 faizlik səviyyənin saxlanmasını təklif edib.

Meksika Mərkəzi Bankı iqtisadiyyatda tələb tərəfindən qiymətlərə artım təzyiqi müşahidə edilmədiyini bildirib. Bank inflyasiyanın 3 faizlik hədəfə yaxınlaşması üçün yeni dərəcənin uzun müddət saxlanmasının vacib olduğunu qeyd edib. Ölkədə ümumi inflyasiya sentyabrın birinci yarısındakı 3,42 faizdən 3,62 faizə yüksəlib.

Braziliyada isə dərəcənin sabit saxlanması mart ayından bəri ardıcıl beş endirimdən sonra baş verib. Bank inflyasiya və baza inflyasiyası göstəricilərinin yüksəldiyini, dövlət xərclərində gözlənilən artımın isə inflyasiya gözləntilərini hədəfdən daha da uzaqlaşdırdığını vurğulayıb.

Mənbəyə görə, Meksikanın dərəcə qərarından sonra peso əvvəlcə ucuzlaşıb, daha sonra yenidən bahalaşıb. Braziliyada isə qərar ölkə iqtisadiyyatının, xüsusilə iqtisadi şəraitə həssas sahələrin zəiflədiyi bir dövrə təsadüf edib.