"Apple"a qarşı antiinhisar işində 3 şirkət sənəd tələblərinə etiraz edir

"Samsung", "Epic Games" və "Roblox" ABŞ Ədliyyə Nazirliyinin "Apple"a qarşı qaldırdığı antiinhisar işi üzrə daxili sənədlərin tələb edilməsinə etiraz edir. Bu barədə BusinessTime "9to5Mac"a istinadən xəbər verir.

Mübahisələr həm "Apple"ın, həm də dövlət ittihamçılarının şirkətlərə göndərdiyi sənəd tələbləri ilə bağlıdır. Şirkətlər bəzi tələblərin həddindən artıq geniş olduğunu, əlavə xərc yaratdığını və məxfi məlumatların açıqlanmasına səbəb ola biləcəyini bildirir.

"Samsung"un ABŞ bölməsi iki rəhbərin sənədlərində axtarış aparılmasına razılıq verib və razılaşdırılmış meyarlara uyğun təxminən 900 min sənəd müəyyən edilib. "Apple" daha altı rəhbərin sənədlərində də axtarış aparılmasını istəyir. "Epic Games" isə əvvəlki məhkəmə işləri və üç yüksək vəzifəli rəhbərlə bağlı sənəd tələblərinin həddindən artıq yük yaradacağını bildirir.

Ağıllı üzük istehsalçısı "Oura" 32 mindən çox əlavə sənədin yoxlanması xərclərinin kimin ödəməli olduğunu mübahisələndirir və kommersiya sirlərinin qorunmasını istəyir. "Garmin" də məxfi maliyyə məlumatları və biznes strategiyası sənədləri ilə bağlı narahatlığını bildirib. "Roblox" isə Ədliyyə Nazirliyi və iddiada iştirak edən ştatların "Apple"la kommersiya münasibətləri və "App Store" qaydaları barədə sənəd tələblərinə etiraz edir.

ABŞ Ədliyyə Nazirliyi 15 ştat və Kolumbiya dairəsi ilə birlikdə iddianı 2024-cü ilin martında qaldırıb. Nazirlik "Apple"ı rəqabəti məhdudlaşdırmaqda ittiham edir, şirkət isə ittihamları rədd edir. Sənəd tələbləri ilə bağlı mübahisədə iştirak edən bir neçə şirkət danışıqları davam etdirmək üçün noyabrın 11-dək vaxt istəyib.