İranla sülh danışıqlarına ümidlər neftin qiymətini 3 faiz aşağı salıb
İran və Qətər arasında vasitəçilik danışıqları barədə xəbərlərdən sonra neft ucuzlaşıb. Brent markalı neftin bir bareli 109,82 ABŞ dollarına, WTI isə 100,57 ABŞ dollarına satılıb.
ABŞ və İran arasında mümkün sülh razılaşmasına dair gözləntilər fonunda neftin qiyməti həftənin əvvəlində 3 faiz geriləyib. Bu barədə BusinessTime "OilPrice"a istinadən xəbər verir.
Qiymət azalması həftəsonu İran və Qətər arasında vasitəçilik danışıqlarının aparılması barədə xəbərlərdən sonraya təsadüf edib. Məqalənin hazırlandığı vaxt Brent markalı neftin bir bareli 109,82 ABŞ dollarına, WTI markalı neftin bir bareli isə 100,57 ABŞ dollarına satılıb.
İranın xarici işlər naziri Abbas Əraqçi Tehranın həm müdafiəyə, həm də diplomatiyaya hazır olduğunu bildirib. "ING"nin əmtəə bazarı strateqləri də ABŞ prezidenti Donald Trampın diplomatiyaya şans verməyə hazır olduğuna dair xəbərlərə diqqət çəkiblər. Bununla yanaşı, onların fikrincə, son həftələrdə neft qiymətlərinin dəyişməsi bazarın ABŞ və İran arasında mümkün yeni hərbi əməliyyatlara hazırlaşdığını göstərir.
"KCM Trade"in baş bazar analitiki Tim Uotererin sözlərinə görə, diplomatik irəliləyişə dair ümidlər və həftəsonu ciddi hərbi gərginliyin olmaması qiymətlərə təzyiqi müvəqqəti azaldıb. Mənbə qeyd edir ki, İran sülh razılaşması üçün bütün şərtlərinin yerinə yetirilməsində israr edir, ABŞ isə buna meyilli olmadığını dəfələrlə bildirib.
