Əkinçidən bu günə - Mətbuat tariximizin şərəfli yolu

Azərbaycan milli mətbuatı — xalqımızın ictimai-siyasi, elmi-mədəni həyatında mühüm rol oynamış və milli oyanış, maarifçilik, dövlətçilik ideyalarının yayılmasında əsas vasitə olmuşdur.
 

Milli mətbuatın əsası 1875-ci il iyulun 22-də Həsən bəy Zərdabinin təşəbbüsü ilə Bakıda nəşr olunan "Əkinçi" qəzeti ilə qoyulmuşdur. Bu qəzet Azərbaycan türkcəsində çap olunan ilk ictimai-siyasi qəzet idi. “Əkinçi” sadə xalq dili ilə yazılırdı, kənd təsərrüfatı, maarif, gigiyena, islahatlar mövzularını işıqlandırırdı.
 
XX əsrin əvvəlləri "Molla Nəsrəddin", "Füyuzat", "İrşad", "Tərəqqi", "Həyat", "Bəsirət" kimi qəzet və jurnallar meydana çıxaraq maarifçiliyi, milli azadlıq ideyalarını və cəmiyyətin islahatlara ehtiyacını təbliğ etmişdir.
 
Sovet dövrü Azərbaycan mətbuatı dövlət nəzarəti altında fəaliyyət göstərsə də, elm, mədəniyyət, texnika sahəsində maarifləndirici rolunu davam etdirmişdir. “Kommunist”, “Ədəbiyyat və incəsənət”, “Azərbaycan müəllimi” və s. qəzetlər bu dövrdə önəmli rol oynamışdır.

22 iyul — Milli Mətbuat Günü hesab olunur. Bu tarix "Əkinçi" qəzetinin çap olunduğu gündür və Azərbaycan jurnalistlərinin peşə bayramı kimi qeyd edilir.

Milli mətbuat xalqın maariflənməsi, ictimai düşüncənin formalaşması, demokratik cəmiyyətin inkişafı, dövlət müstəqilliyinin qorunması və söz azadlığının təmin olunması baxımından mühüm rol oynamışdır.

Peşə bayramınız mübarək!

Aslan ABBASZADƏ
Faktor.az xəbər portalının
Təsisçisi və Baş Redaktoru