“SK Hynix” ABŞ-da 29 milyard dollar cəlb etmək istəyir
Cənubi Koreyanın “SK Hynix” şirkəti çərşənbə günü bildirib ki, investor bazasını və süni intellekt üçün istifadə olunan çiplərin istehsal gücünü genişləndirmək məqsədilə Amerika Depozitar Qəbzlərinin (ADR) birja yerləşdirilməsi vasitəsilə 45,45 trilyon vona (29,43 milyard ABŞ dolları) qədər vəsait cəlb etməyi planlaşdırır.
Şirkətin tənzimləyici quruma təqdim etdiyi açıqlamaya əsasən, yekun məbləğ sifarişlərin toplanması prosesindən (bookbuilding) sonra dəyişə bilər.
Dünyanın ikinci ən böyük yaddaş çipi istehsalçısı olan “SK Hynix” 10 iyul tarixində “Nasdaq” bazarında ADR yerləşdirilməsini dəstəkləmək üçün 17,79 milyon yeni səhm buraxmağı planlaşdırdığını bildirib.
Şirkətin məlumatına görə, cəlb ediləcək vəsait Yonqin şəhərində yeni çip zavodunun, Çonqcu şəhərində qabaqcıl qablaşdırma (advanced packaging) müəssisəsinin tikintisinə, həmçinin Ekstremal Ultrabənövşəyi Litografiya (EUV) skaneri kimi çip istehsalı avadanlıqlarının alınmasına yönəldiləcək.
“SK Hynix” qeyd edib ki, 10 ADR bir adi səhmə bərabər olacaq. Təklifin idarəedilməsi ilə “BofA Securities”, “Citigroup Global Markets”, “Goldman Sachs” və “JP Morgan Securities” məşğul olacaq.
Əgər yerləşdirmə göstərilən qiymət aralığının yuxarı həddində həyata keçirilərsə, bu, tarixdə ən böyük ADR təklifi olacaq və 2014-cü ildə Nyu-York birjasında debüt zamanı Çin elektron ticarət nəhəngi “Alibaba” tərəfindən cəlb edilmiş 21,8 milyard dollarlıq rekordu geridə qoyacaq.
“Nvidia” və “Alphabet” şirkətinin “Google” bölməsi kimi müştərilər üçün süni intellekt sistemlərində istifadə olunan yüksək ötürmə qabiliyyətli yaddaş (HBM) çiplərinin əsas təchizatçılarından biri olan “SK Hynix” qlobal süni intellekt bumunun ən böyük benefisiarlarından birinə çevrilib. Şirkət bazar dəyərinə görə bazar ertəsi günü “Samsung Electronics”i geridə qoyaraq Cənubi Koreyanın ən dəyərli şirkəti olub.
Valyuta.az
